ដំណើលើវិថីសិក្សាថ្មីសម្រាប់អនាគតយុវសិស្ស អ.ប.ស

  

 បន្ទាប់បីបានខិតខំសិក្សារៀនសូត្រអស់រយៈ១២ឆ្នាំ យុវសិស្សអង្គការ អ.ប.ស បានឃើញនិង ទទួលស្គាល់នូវលទ្ធផលនៃការសិក្សារបស់ពួកគាត់ តាមរយៈលទ្ធផល នៃការប្រឡងសញ្ញាបត្រមធ្យមសិក្សាទុតិយភូមិ ឆ្នាំ២០១៨។ ៥០% នៃក្រុមរបស់ពួកគាត់ ទទួលបានជោគជ័យក្នុងការប្រឡង។ ទោះជាយ៉ាងណាក៏ដោយ ពួកគាត់ដែលមិនទាន់ទទួលបានជោគជ័យសម្រាប់ការប្រឡងឆ្នាំនេះ បានប្តេជ្ញានិងខិតខំបន្ថែម និងចូលរួមប្រកួតប្រជែងក្នុងឆ្នាំបន្ទាប់ទៀត។

ជាការពិតណាស់ លទ្ធផលនៃការប្រឡងគឺបានបង្ហាញពីសមត្ថភាពរបស់សិស្ស ក្នុងការសិក្សារបស់ពួកគាត់។ ​គួរបញ្ជាក់ផងដែរថា លទ្ធផលជាប់ឬ ធ្លាក់នេះ​មិនមែនជាកត្តាដែលកំណត់ជោគវាសនា របស់ពួកគាត់ឡើយ។ ពួកគាត់មានពេលវេលាច្រើនឆ្នាំខាងមុខទៀត ដើម្បីធ្វើការតស៊ូ ខិតខំ និិង ប្រើប្រាស់នូវជំនាញផ្សេងៗ ដែលគាត់ចូលចិត្ត ដើម្បីស្វែងរកនូវការងារ បង្កើតប្រាក់ចំណូល របស់ពួកគាត់ក្នុងពេលអនាគត។

អង្គការ អ.ប.ស ក៏ដូចជាអាណាព្យាបាលសិស្សដទៃទៀតផងដែរ បានខិតខំជ្រោមជ្រែង ពន្យល់ ណែនាំ លើកទឹកចិត្ត ដល់កូនៗ និង សិស្សានុសិស្សទាំងអស់ដូចៗគ្នា។ លទ្ធផលដែលស្តែងចេញ យ៉ាងណា គឺបានកើតពីការប្រព្រិត្តរបស់សិស្សផ្ទាល់ខ្លួន។ យើងនៅតែសង្ឃឹមថា សិស្សានុសិស្សទាំងអស់ និងខិតខំបន្ថែមដើម្បីភាពជោគជ័យរបស់ពួកគាត់នៅថ្ងៃខាងមុុខទៀត។